ابليس رايح اعارة

علي باب سفارة كندا قابلت ابليس
وفي ايده استمارة
قلت له علي فين؟؟
قالي بص يا هجرة يا إعارة
يا عم خلاص زهجت كفرت
ألاقيش معاك سيجارة؟؟
أنا انتهيت خلاص
لا عاد نافع وسواس
ولا خناس
ولا عاد ليه عيش بين الناس
دي عالم مجرمين
عندكو فائض فساد في كل البلاد
مش محتاجين شياطين
مليش عيش في البلد ده
بقينا عاطلين
وانتو بتعرفوا تقلبوا الحق باطل
تسكتوا عن القاتل
وتمشوا في جنازة المقتول ومفيش مشاكل
يا عم ده أنا بقيت أوسوس بالمقلوب
بقيت أقول للحرامي توب
أنت لوحدك هتعمل كل الذنوب؟؟؟

انا ابليس اشتغل واعظ وكمساري في اتوبيس
يا عم من زمان بستنى حد ينسي يسمي وهو بياكل لقمته
دلوقتي اكلكم ملوث
وبصراحة الواحد خايف علي صحته
ده مفيش ضمير اساساً علشان اموته
كل واحد بمزاجه خربانة زمته
يا عم ده كل حاجة اتسرقت
والاجيال الجاية من الحرامية اتظلمت
يا راجل ده من كتر ما لطشت معايا
طلعت في مظاهرة مع الناس
اللي بتقول كفاية
وبرضه مفيش فايده

ماشاء الله عليك .حياكى الله..كلام يعبر عن الواقع بس ليس بغريب على قلم يكتب على صفحات الحياه.ننتظر الكثير من سيادتكم
.

والله عندك حق الحياة أصبحت كدة فعلا بالمقلوب والغريب اننا كل حاجة بنقول الشيطان وهو بقى غلبان أكتر من البشر

ومازلنا فى انتظار المزيد